महोत्तरी । सशस्त्र प्रहरीले महोत्तरीबाट लागूऔषधसहित दुई जनालाई पक्राउ गरेको छ ।
पक्राउ पर्नेमा गोर्खाको बुढीगण्डकी गाउँपालिका–२ बस्ने २३ वर्षीय अजय परियार र नुवाकोटको विदुर नगरपालिका–७ बस्ने ३० वर्षीय संजय भट्ट रहेका छन् । उनीहरुलाई सम्सी गाउँपालिका–७ चाँदनी चोकबाट पक्राउ गरिएको प्रहरीले जनाएको छ ।
चाँदनी चोकमा प्रदेश नं. ०२–०२२ प ३४७२ नम्बरको मोटरसाइकलमा सवार उनीहरुलाई चेकजाँच गर्दा कालो झोलामा अगरबत्तीभित्र लागूऔषध लुकाएर ल्याउँदै गरेको अवस्थामा फेला पारेको सशस्त्र प्रहरी बल नेपाल नम्बर ९ गणका गणपति सशस्त्र प्रहरी उपरीक्षक सुरेश सापकोटाले जानकारी दिए ।
पक्राउ परेका उनीहरुको साथबाट नाइट्राभेट ट्यावलेट २ हजार ३७० थान, प्रामेफाजिन हाइड्रोक्लोराइड इन्जेक्सन १२१ थान, ओफिन इन्जेक्सन ११८ थान, डाइजेल्याव इन्जेक्सन १७१ थान, डाइजेपाम इन्जेक्सन ४६ थान बरामद गरेको सापकोटाले बताए ।
पक्राउ परेका दुवैजनालाई आवश्यक कारवाहीका लागि जिल्ला प्रहरी कार्यालय महोत्तरीको जिम्मा लगाइएको छ ।
प्रतिक्रिया