जनकपुरधाम । प्रहरीले सर्लाहीबाट एक थान कटुवा पेस्तोल र त्यसमा लाग्ने ५ राउण्ड गोली बरामद गरेको छ ।
प्रहरीले लालबन्दी नगरपालिका–५ स्थित रेल्वे ट्रयाकबाट शुक्रबार बिहान करिव साढे ५ बजे सो सामानहरु बरामद गरेको हो ।
सशस्त्र प्रहरी सुरक्षा बेस क्याम्प हरिवनबाट सशस्त्रका डीएसपी दीपेन्द्र थापाको कमाण्डमा खटेको गस्ती टोलीलाई देख्नासाथ प्रदेश २–०२–००४ प ७७५७ नम्बरको मोटरसाइकल छाडेर चालक फरार भएका थिए ।
उक्त मोटरसाइकल चेकजाँच गर्दा लेगगार्डमा झुण्ड्याएर राखेको झोलामा एक थान कटुवा पेस्तोल र ५ थान गोली बरामद भएको सशस्त्र प्रहरी उपरीक्षक गंगाराम श्रेष्ठले जानकारी दिए ।
श्रेष्ठका अनुसार एक राउण्ड पेस्तोलमा लोड भएको र ४ राउण्ड बाहिरै रहेको गोली बरामद भएको हो । बरामद भएको हतियार र मोटरसाइकल अनुसन्धानका लागि ईलाका प्रहरी कार्यालय लालबन्दीको जिम्मा लगाइएको उनले बताए ।
प्रतिक्रिया