एजेन्सी । पाकिस्तानका अनुभवी ब्याट्म्यान तथा पूर्वकप्तान सोएब मलिक र वेस्ट इन्डिजका अलराउन्डर कार्लोस ब्रेथबेटले चौथो संस्करणको एभरेस्ट प्रिमियर लिग (इपिएल) खेल्ने भएका छन् ।
आयोजकले सोमबार पत्रकार सम्मेलन गर्दै मलिक र ब्रेथवेटले इपिएल खेल्ने पक्का भए पनि कुन क्लबाट खेल्ने टुंगो लागिनसकेको जानकारी गराएको हो ।
मलिकले पाकिस्तानका लागि तीनै प्रारूपमा गरी ४३८ खेल खेल्दा १२ शतक र ६० अर्धशतकसहित कुल ११ हजार ७६८ रन प्रहार गरेका छन् । पार्ट टाइमर स्पिनरसमेत रहेका मलिकले तीनै प्रारूपमा कुल २१८ विकेट लिएका छन् ।
वेस्ट इन्डिजलाई सन् २०१६ को टि–२० विश्वकप उपाधि दिलाउन महत्वपूर्ण भूमिका निर्वाह गरेका ब्रेथवेटले देशका लागि तीनै प्रारूपमा गरी ८८ खेल खेल्दा १ शतक र ४ अर्धशतकसहित कुल १ हजार ५० रन प्रहार गरेका छन् ।
बे्रथवेटले तीनै प्रारूपमा गरी कुल ७५ विकेट हात पारेका छन् । आगामी असोज ९ देखि २३ सम्म कीर्तिपुरस्थित त्रिवि क्रिकेट मैदानमा हुने प्रतियोगितामा ६ फ्रेन्चाइज टोलीको सहभागिता रहनेछ ।
प्रतिक्रिया