ताजा समाचार


अवैध खोला उत्खनन् बढ्दै, दिगम्वरपुरका स्थानीयद्वारा  स्काईभेटर नियन्त्रणमा लिइयो 

द रियल समाचार     २०७८ बैशाख २५, शनिबार, २०: २४ मा प्रकाशित




विनोद कुमार महतो, जनकपुरधाम । धनुषाको उत्तरी क्षेत्रका खोलाहरुमा जनप्रतिनिधि र प्रहरी प्रशासनकै संरक्षणमा भईरहेको अवैध खोला उत्खनन् झन बढ्दै गएको छ ।

क्षीरेश्वरनाथ नगरपालिका, मिथिला नगरपालिका, गणेशमान चारनाथ नगरपालिका, बटेश्वर गाउँपालिका अन्तर्गत पर्ने खोलाहरुमा अवैध गिट्टी बालुवा उत्खनन् दिनप्रतिदिन बढिरहेको छ ।

धनुषाको उत्तरी क्षेत्रमा रहेको यी पालिकाहरुमा पर्ने औरही, जलाद, बडहडी, बसही चारनाथ लगायतका खोलाहरुमा क्रसर माफियाले मापदण्ड विपरित १५ देखि २० फिट गहिरोसम्म नदीबाट बालुवा गिट्टी उत्खनन् गरिरहेका छन् । तर जनप्रतिनिधि र प्रहरी प्रशासन क्रसर माफियाहरुसँग महिनावारी रुपमा मोटो कमिसन लिइरहेका कारण मुकदर्शक बनेको स्थानीयबासिन्दाको आरोप छ ।


यसै क्रममा प्रहरी प्रशासन र जनप्रतिनिधिको सेटिङ्ग्मा नै जलाद नदीमा अवैध खोला दोहन गरिरहेको स्काइभेटिर दिगम्वरपुरका स्थानीय बासिन्दाहरुले शुक्रवार नियन्त्रणमा लिएका छन् । धनुषाको क्षीरेश्वरनाथ नगरपालिकाको वडा नम्बर-७ र ८ को बिचमा पर्ने जलाध खोलामा अवैध रुपमा बालुवा गिट्टी उत्खनन् गरिरहेको अवस्थामा प्रदेश ३–०१–००३ क ५२१३ नम्बरको स्काइभेटर स्थानीय बासिन्दाले नियन्त्रणमा लिएका हुन् ।

उक्त स्काइभेटर सोहि नदी किनारमा संचालित क्षीरेश्वर बालुवा गिट्टी प्रसोधन उद्योगको रहेको स्थानीयको दावी छ । स्काइभेटर नियन्त्रणमा लिने क्रममा जलाध खोलामा दिगम्वरपुरका स्थानीयबासी र ईलाका प्रहरी कार्यालय सखुवा महेन्द्रनगरबाट खटेको प्रहरी टोलीबीच घम्साघम्सी समेत भएको थियो । गाउँबासीका अनुसार प्रहरी प्रशासन लगायत व्यक्तिहरुको मिलोमतोमा जथाभावी खोलामा स्काइभेटर लगाएर नीजि जग्गा र खेती योग्य जमिन खोलामा खस्ने गरी क्रसर माफियाहरुले खोला उत्खनन् गरिरहेको आरोप छ ।

यता क्षीरेश्वरनाथ नगरपालिका वडा नम्बर-८ का वडाध्यक्ष अशेश्वर महतोले खोलामा स्काइभेटर लगाएर जथाभावी उत्खनन् भइरहेको खवर पाएपछि गाउँबासीले स्काइभेटर नियन्त्रणमा लिएको बताए । उनले अवैध तरिकाले मापदण्ड विपरित भईरहेको खोला उत्खनन् र स्काईभेटर नियन्त्रणमा लिदएको बारे छलफलबाट समस्या समाधान गर्ने समेत बताएका छन् । सो अबैध खोला उत्खनन् रोक्नका लागि प्रहरीले कुनै चासो नदेखाएको आरोप लगाउँदै अध्यक्ष महतोले क्रसर माफियाहरुको कमिशनको लोभमा फसेर प्रहरी प्रशासन नै सुरक्षा दिइरहेको दावी गरे ।

कोरोना नियन्त्रणका लागि गाउँमा भिडभाड रोक्न प्रहरीलाई आग्रह गर्दा पनि कुनै सुनवाई नगरेको तर स्काईभेटर नियन्त्रणमा लिएको ५ मिनेटभित्रै क्रसरबलालाई सुरक्षा दिन र स्काईभेटर छुटाउन तुरन्तै आउने दृष्यले पनि क्रसर माफियासँग प्रहरीको सेटिङ्ग रहेको उनको दावी थियो ।

नगरपालिकाले खोला ठेक्का लगाउने समयमा स्काईभेटर प्रयोग नगर्ने र बेल्चाले उठाएर ट्याक्टरमा बालुवा गिट्टी ओसार्ने निर्णय गरी ठेक्का सम्झौता गरिएको जानकारी दिँदै अध्यक्ष महतोले पछिल्लो पटक जिल्ला समन्वय समिति धनुषाले गरेको विवादित निर्णयको कारण अवैध खोला उत्खनन् बढेको गुनासो गरेका छन् ।
यता ईलाका प्रहरी कार्यालय सखुवा महेन्द्रनगरका प्रहरी निरीक्षक तीलक सुनारले अवैध खोला दोहनमा प्रहरीको कुनै संलग्नता नरहेको दावी गरेका छन् ।

यो खबर पढेर तपाईलाई कस्तो महसुस भयो ?


प्रतिक्रिया




Top