सिरहा । सिरहामा गत आईतबार एक युवकको हत्या गरेको आरोपमा उनकै काकाका छोरासहित दुईजना पक्राउ परेका छन् ।
सिरहाको मिर्चैया नगरपालिका-७ का २८ वर्षीय शिवकुमार यादवको हत्या गरेको आरोपमा उनको आफ्नै काकाका छोरा विष्णु यादवलाई प्रहरीले पक्राउ गरेको हो ।
शिवकुमारको शव गत आईतबार राति हत्या गरिएको अवस्थामा मिर्चैया नगरपालिका–१ स्थित आँप बगैंचामा भेटिएको थियो । विष्णुले शिवकुमारको अपहरण गरी ५० लाख रुपैयाँ फिरौती मागेको र परिवारजनले फिरौती रकम नदिँदा उनले शिवकुमारको हत्या गरेको प्रारम्भिक अनुसन्धानबाट देखिएको प्रदेश २ का प्रहरी प्रमुख डीआईजी धिरजप्रताप सिंहले जानकारी दिए।
उनले भने,‘विष्णुले आफ्ना सालो इन्द्रदेव यादवसँग मिलेर शिवकुमारको अपहरण गरी हत्या गरेको खुलेको छ । हत्यामा संलग्न दुबै जना बुधबार पक्राउ परेका छन् ।’
प्रहरीका अनुसार विष्णुले शिवकुमारको परिवारसँग ५० लाख रुपैयाँ फिरौती मागेका थिए । फिरौती नपाएपछि आईतबार राति उनको हत्या गरी शव कंक्रिटले छोपेर उनीहरु भागेका थिए। उनीहरुले शिवकुमारको मोवाइल खोलामा फालिदिएका थिए ।
शिवकुमारका दाजु भर्खरै वैदेशिक रोजगारीबाट फर्केकोले रकम असुल्ने उद्देश्यले उनको अपहरण गरेको देखिएको डीआईजी सिंहले बताए ।
डीआईजी सिंहले शिवकुमारका दाजु वैदेशिक रोजगारीबाट फर्केकोले उनीहरूले माग्ने जति रकम पाउने सोंचका साथ शिवकुमारको अपहरण गरेको र रकम नपाएपछि उनको हत्या गरेको बताए।
पक्राउ परेकाहरुमाथि आवश्यक कारवाहीका लागि प्रहरी हिरासतमा राखिएको छ ।
प्रतिक्रिया