सिन्धुली । सिन्धुलीमा सवारी दुर्घटनामा परि ४ जनाको मृत्यु भएको छ भने ७ जना घाइते भएका छन् ।
जिल्लाको कमलामाइ नगरपालिका वडा नम्बर–७ करङडाँडामा बा १७ च १११७ नम्बरको जिप मंगलबार दिउँसो पौने ४ बजे सडकबाट ५० मिटर तल खस्दा ४ जनाको घटनास्थलमै मृत्यु भएको जिल्ला प्रहरी कार्यालय सिन्धुलीका प्रवक्ता प्रहरी नायब उपरिक्षक मनोजकुमार लामाले जानकारी दिए ।
मृत्यु हुनेमा कमलामाइ नगरपालिका बाँसकोटका ६५ वर्षीय रुद्रबहादुर थापा, १८ वर्षीया रीता इस्माली, १९ वर्षीया दुर्गा श्रेष्ठ र उनका २ वर्षीय छोरा मनिष श्रेष्ठ रहेको प्रहरीले जनाएको छ ।
जिपका चालक भोजबिक्रम थापासहित घाइतेहरुलाई जिल्ला अस्पताल सिन्धुली पठाइएको छ । चालकको अवस्था गम्भीर रहेकाले धुलिखेल पठाउने तयारी भइरहेको डीएसपी लामाले जानकारी दिए ।
सिन्धुली सदरमुकाम सिन्धुलीमाडीबाट बाँसकोटतर्फ जाँदै गरेको जिप आफैं अनियन्त्रित भएर पल्टिएको प्रारम्भिक अनुसन्धानबाट देखिएको लामाले बताए । जिपमा ११ जना सवार रहेको प्रहरीले जनाएको छ ।
तस्बिर : सांकेतिक
प्रतिक्रिया