दैलेख । दैलेखमा भएको सवारी दुर्घटनामा परि दुईजनाको मृत्यु भएको छ भने १६ जना घाइते भएका छन् ।
कर्णाली राजमार्गअन्तर्गत दैलेखको आठबिस नगरपालिका–१ स्यालाकोटमा बस दुर्घटना हुँदा दुईजनाको मृत्यु हुनुका साथै १६ जना घाइते भएका हुन् ।
बिहीबार कालीकोटबाट सुर्खेतर्फ आउँदै गरेको कर्णाली प्रदेश–०२–००१ ख ०२४७ नम्बरको मिनीबस अनियन्त्रित भई सडकबाट करिब सय मिटर तल खसेर दुर्घटना भएको जिल्ला प्रहरी कार्यालय दैलेखका प्रवक्ता प्रहरी नायब उपरीक्षक अनुप श्रेष्ठले जानकारी दिए ।
बसमा सवार १८ जनामध्ये एकजनाको घटनास्थलमै र अर्का एकजनाको उपचारको क्रममा अस्पतालमा मृत्यु भएको हो । मृत्यु हुनेमा कालिकोटकाे शुभकालिका गाउँपालिका-१ भर्ताका अन्दाजी ३७ वर्षीय जितेन्द्रबहादुर शाही र कालिकोटकै नरहरिनाथ गाउँपालिकाका २१ वर्षीय कमल विक रहेको प्रहरीले जनाएको छ ।
बसमा तीनजना प्रहरी पनि सवार रहेकाेमा प्रहरी जवान रमेश चाैधरी गम्भीर घाइते भएका छन् । दुर्घटनामा परी घाइते भएकामध्ये ७ जना गम्भीर रहेका छन् । उनीहरुलाई उपचारका लागि दैलेख जिल्ला अस्पतालमा पठाइएको छ भने अन्य सामान्य घाइतेहरुको स्थानीय मेडिकलमा उपचार भइरहेको छ ।
दुर्घटनाको विषयमा थप अनुसन्धान भइरहेको दैलेख प्रहरीले जनाएको छ ।
प्रतिक्रिया