बारा । बारामा एक युवकको घाँटी रेटेर हत्या गरिएको छ ।
जिल्लाको निजगढ नगरपालिका वडा नम्बर-९ बुद्धचोकका १९ वर्षीय काले भन्ने रोहित शर्माको घाँटी रेटीएको अवस्थामा शव फेला परेको हो ।
शर्माको शव उनको आफ्नै घरभित्र फेला परेको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिए ।
घरमा एक्लै सुतिरहेका बेला धारिलो हतियार प्रहार गरी शर्माको कसैले निर्ममतापूर्वक हत्या गरेको बताइएको छ ।
प्रहरीले घटना सम्बन्धमा थप अनुसन्धान अगाडी बढाएको प्रहरी नायब उपरीक्षक मिश्रले बताए ।
यसैबिच घटनामा संलग्न भएको हुनसक्ने आशंकामा एकजना शंकास्पद व्यक्तिलाई प्रहरीले रौतहटको चपुरबाट पक्राउ गरेको छ ।
पक्राउ पर्ने व्यक्ति मृतकको साथी रहेको स्रोतले जनाएको छ । तर प्रहरीले उनको विवरण सार्वजनिक गरेको छैन ।
डिएसपी मिश्रले शंकास्पद एकजना व्यक्ति पक्राउ परेपनि उनको संलग्नताबारे भेरिफाइ गर्न बाँकी रहेको बताए ।
प्रतिक्रिया