एजेन्सी । विश्वकै चर्चित टि–२० फ्रेन्चाइज क्रिकेट लिग इन्डियन प्रिमियर लिग (आइपिएल) को १४ औं संस्करणको खेल तालिका सार्वजनिक भएको छ ।
भारतीय क्रिकेट कन्ट्रोल बोर्ड (बिसिसिआई) ले आइतबार सन् २०२१ को आइपिएल खेल तालिका सार्वजनिक गरेको हो । यसपटकको आइपिएल अप्रिल ९ देखि मे ३० सम्म भारतका ६ सहरमा आयोजना गरिनेछ ।
कोरोना भइरसका कारण यसपटकको आइपिएल बैंग्लोर, मुम्बई, चेन्नई, दिल्ली, कोलकत्ता र अहमेदाबादमा मात्र हुने भएको हो । तालिका अनुसार अप्रिल ९ मा हुने उद्घाटन खेलमा साविकको बिजेता मुम्बई इन्डियन्सले रोयल च्यालेन्जर्स बैंग्लोरको सामना गर्नेछ ।
अहमदाबादस्थित विश्वकै सबैभन्दा ठूलो क्रिकेट मैदान नरेन्द्र मोदी क्रिकेट मैदानमा आइपिएलका प्ले अफ र फाइनल खेल हुनेछन् । प्ले अफका खेलहरू मे २५, २६ र २८ मा हुनेछ भने फाइनल खेल मे ३० मा हुनेछ ।
कोरोना महामारीका कारण अघिल्लो संस्करण संयुक्त अरब इमिरेट्स (युएई) मा भएको थियो । यसपटक विशेष स्वास्थ्य सावधानी अपनाएर भारतमै आइपिएल आयोजना गर्ने निर्णय बिसिसिआईले गरेको हो ।
प्रतिक्रिया