ताप्लेजुङ । ताप्लेजुङको मेरिङ्देन गाउँपालिका–३ स्थित दोभान बजारमा भीषण आगलागी भएको छ ।
मंगलबार बिहान १० बजे भोला पौडेलको घरबाट सुरु भएको आगो अझै नियन्त्रणमा आएको छैन । पौडेलका घरबाट विद्युत् चुहिएर आगलागी भएको स्थानीयवासी गणेश कार्कीले बताए ।
आगलागीबाट ४० घर पुर्ण रुपमा जलेको ताप्लेजुङका डिएसपी बालनरसिंह राणाले जानकारी दिए । उनले भने, ‘आगो नियन्त्रणमा आइसकेको अवस्था छैन तर, थप क्षति नहुनेगरी नियन्त्रणको प्रयास भइरहेको छ ।’
ताप्लेजुङको दमकल आगलागी क्षेत्रमा पुगेको र छिमेकी जिल्ला पाँचथरदेखि पनि आउँदै गरेको जिल्ला प्रहरी कार्यालयका प्रमुख बालरनसिंह राणाले जानकारी दिए । उनले भने, ‘म पनि आगलागी क्षेत्रमा जाँदै छु । आगलागी भीषण छ भन्ने खबर आएको छ ।’ सुरक्षाकर्मी र स्थानीयवासीले आगो नियन्त्रण गर्ने पहल गरिरहेको कार्कीले जानकारी दिए ।
ताप्लेजुङ सदरमुकाम फुङलिङपछिको दोस्रो ठूलो बजार रहेको दोभान बजार एक अर्कामा जोडेर बनाइएका काठ र टिनबाट निर्मित घर भएकोले आगो धेरै फैलिइरहेको छ ।
प्रतिक्रिया