पर्सा । पर्साको वीरगञ्ज कारागारमा थुनुवा भेट्न गएका एक युवकलाई चरेससहित प्रहरीले पक्राउ गरेको छ । पक्राउ पर्नेमा सिन्धुपाल्चोक भोटेकोशी गाउँपालिका–१ बस्ने २२ वर्षीय मिङमा शेर्पा रहेको प्रहरीले जनाएको छ ।
लागूऔषध मुद्दामा पुर्पक्षका लागि थुनामा रहेका आफ्ना भाइ २० वर्षीय लाक्पा शेर्पालाई भेट्न गएका मिङलाई लागूऔषध चरेससहित पक्राउ गरिएको हो ।
कारागारको ड्युटीमा खटिएको प्रहरी टोलीले कैदीबन्दी भेटघाटका लागि आएका व्यक्तिहरूलाई चेकजाँच गर्ने क्रममा मिङमा पक्राउ परेका हुन् । मिङमाले प्लाष्टिकको झोलाभित्र राखेर भाइको लागि ल्याएको जुत्ताभित्र करिब १० ग्राम चरेस बरामद भएको जिल्ला प्रहरी कार्यालय पर्साका प्रवक्ता प्रहरी नावय उपरीक्षक ओमप्रकाश खनालले जानकारी दिए ।
पक्राउ परेका शेर्पालाई लागूऔषध मुद्दामा थप अनुसन्धान भइरहेको पर्सा प्रहरीले जनाएको छ ।
प्रतिक्रिया