बारा । बारा प्रहरीले स्रोत नखुलेको २५ लाख रुपैयाँसहित दुई जनालाई पक्राउ गरेको छ ।
पक्राउ पर्नेमा भारतको बिहार राज्य अन्तर्गत पूर्वी चम्पारण ग्राम पञ्चायत नरकटिया-७ टोल नरकटिया बस्ने ३५ वर्षीय चन्द्र शेखर प्रसाद र ३८ वर्षीय सञ्जय कुमार रहेका छन् ।
बुधबार बिहान करिव साढे ११ बजे कलैया-मटिअर्वा सडकखण्ड अन्तर्गत कलैया उपमहानगरपालिका-८ बरेवा टोलमा चेकजाँचको क्रममा बीआर०५के ०७९८ नम्बरको मोटरसाइकलको डिक्किमा लुकाएर ल्याउँदै गरेको अवस्थामा उनीहरुको साथबाट २५ लाख ३५ हजार रुपैयाँ बरामद गरिएको जिल्ला प्रहरी कार्यालय बाराका प्रवक्ता प्रहरी नायव उपरिक्षक गौतम मिश्रले जानकारी दिए ।
उनीहरुको साथबाट एक हजार दरका १,७७२ थान अर्थात १७ लाख ७२ हजार र पाँच सय दरका १,५२६ थान अर्थात ७ लाख ६३ हजार रुपैयाँ गरी जम्मा २५ लाख ३५ हजार रुपैयाँ बरामद भएको प्रहरीले जनाएको छ ।
रकमका बारेमा स्रोत नखुलाएकोले मोटरसाइकलसहित दुबै जनालाई नियन्त्रणमा लिई आवश्यक अनुसन्धान सुरु गरिएको जिल्ला प्रहरी कार्यालय बाराले जनाएको छ ।
प्रतिक्रिया