जनकपुरधाम । मुख्यमन्त्री स्वच्छता अभियानको गाडीले ठक्कर दिंदा सिरहामा एकजना टेम्पो चालकको मृत्यु भएको छ ।
सिरहास्थित सिरहा–चौहर्वा सडकखण्ड अन्तर्गत सिरहाको बिष्णुपुर गाउँपालिका वडा नम्बर– ५ लक्ष्मीपुर चौकमा सिरहाबाट चोहर्वा तर्फ जाँदै गरेको स १ ह ३०४३ नम्बरको टेम्पोलाई चोहर्वाबाट सिरहा तर्फ जाँदै गरेको मुख्यमन्त्री स्वच्छता अभियानको प्रदेश २–०२००१ झ ००५७ नम्बरको स्कारपियोकोले ठक्कर दिंदा सिरहाको कल्याणपुर नगरपालिका वडा नम्बर १२ बस्ने अन्दाजी ४० वर्षीय टेम्पो चालक जय प्रकाश साहको मृत्यु भएको जिल्ला प्रहरी कार्यालय सिरहाले जनाएको छ ।
शुक्रबार विहान करिब ११ बजेतर्फ टेम्पोलाई सो स्कारपियोले ठक्कर दिएको प्रहरीले जनाएको छ । ठक्करबाट घटनास्थलमै टेम्पो चालक साहको मृत्यु भएको बताइएको छ । ठक्कर दिने मुख्यमन्त्री स्वच्छता अभियानको गाडी र गाडीका चालक जनकपुरधाम उपमहानगरपालिका वडा नम्बर–७ बस्ने ३५ वर्षीय रबिन्द्र झालाई नियन्त्रणमा लिइएको प्रहरीले जनाएको छ ।
मृतक टेम्पो चालकको शव पोष्टमार्टमाका लागि लहानस्थित रामकुमार उमाप्रसाद मुरारका स्मारक अस्पतालमा राखिएको जिल्ला प्रहरी कार्यालय सिरहाका प्रहरी उपरिक्षक सुदिप राजभण्डारीले जानकारी दिए ।
प्रतिक्रिया