रौतहट । प्रदेश २ को रौतहट जिल्लाबाट स्रोत नखुलेको करिव २२ लाख रुपैयाँसहित एक युवक पक्राउ परेका छन् ।
पक्राउ पर्नेमा जिल्लाको परोह नगरपालिका वडा नम्बर–१ जिँगडवा वेलविछुवा बस्ने २७ वर्षीय मोहमद दिलसाद आलम रहेका छन् । आलमलाई सोमबार गौर नगरपालिका–४ बसपार्क नजिकैको सडकबाट प्रहरीले पक्राउ गरेको जिल्ला प्रहरी कार्यालय रौतहटका प्रवक्ता प्रहरी नायव उपरीक्षक भरत श्रेष्ठले जानकारी दिए ।
स्कुटरमा सवार आलमको साथबाट २१ लाख ९० हजार रुपैयाँ बरामद भएको उनले बताए । १ हजार दरका १८१०, ५ सय दरका ४८०, १ सय दरका ३००, ५० दरका १८००, २० दरका ९०१ र १० दरका २०० वटा नोट बरामद भएको प्रहरी नायव उपरीक्षक श्रेष्ठले जानकारी दिए ।
उनको साथबाट मोहमद दिलसाद आलमको नाममा ३१ लाख १६ हजार रुपैयाँ उल्लेख भएको चेकसमेत बरामद भएको डिएसपी श्रेष्ठले बताए । पक्राउ परेका आलमलाई आवश्यक कारबाहीका लागि सम्पत्ति शुद्धीकरण विभागमा पठाइएको रौतहट प्रहरीले जनाएको छ ।
प्रतिक्रिया