सिन्धुली । सिन्धुलीमा जन्ती बोकेको ट्रयाक्टर दुर्घटना हुँदा १ जनाको मृत्यु भएको छ भने ३३ जना घाइते भएका छ ।
ट्रयाक्टरमा सवार ३४ मध्ये १ जनाको उपचारको क्रममा मृत्यु भएको छ भने अन्य ३३ जना घाइते भएको जिल्ला प्रहरी कार्यालय सिन्धुलीले जनाएको छ । घाइते मध्ये ५ जनाको अवस्था गम्भीर रहेको बताइएको छ । उनीहरुलाई हेलिकप्टरमार्फत काठमाण्डौको ट्रमा सेन्टरमा थप उपचारका लागि पठाइएको छ ।
जन्ती बोकेको ना. ५ त. ५३५६ नम्बरको ट्रयाक्टर अनियन्त्रित भई दुर्घटनाग्रस्त हुँदा मरिण गाउँपालिका–२ का २५ वर्षीय प्रताप लोको मृत्यु भएको हो । उनको उपचारको क्रममा ट्रमा सेन्टर काठमाण्डौमा मृत्यु भएको सिन्धुलीका प्रहरी निरीक्षक सन्तोषकुमार पोखरेलले जानकारी दिए ।
मदन भण्डारी राजमार्गको हरिहरपुरगढी गाउँपालिका–२ बखफरबाट मरीण गाउँपालिका–२ रातमाटेतर्फ जन्ती लिएर आउँदै गरेको ट्रयाक्टर दुर्घटनामा परेको प्रहरीले जनाएको छ ।
प्रतिक्रिया