काठमाण्डौ । निर्वाचन आयोगले निर्वाचनमा ७ अर्ब ७ करोड ९४ लाख ८० हजार रुपैयाँ खर्च लाग्ने अनुमान गरेको छ ।
सरकारले बैशाख १७ र २७ गते दुई चरणमा निर्वाचन गर्ने घोषणा गरेको हो । आयोगले अर्थ मन्त्रालयसँग सो रकम माग्ने निर्णयसमेत गरेको छ । आयोगका प्रवक्ता राजकुमार श्रेष्ठले कोरोना महामारीको समयमा निर्वाचन सञ्चालन र व्यवस्थापन गर्दा मितव्ययीता अपनाउने गरी आयोगले कार्यविधि बनाएको बताए ।
श्रेष्ठले भने,‘विगतका निर्वाचनमा प्रयोग गरी हाल मौज्दातमा रहेका मतपेटिका लगायत विभिन्न उपकरण र सवारी साधनहरू मर्मत गरी प्रयोग गर्ने व्यवस्था गरिएकोले नयाँ सामग्री, उपकरण र सवारी साधन खरिद गर्नेगरी बजेटमा समावेश गरिएको छैन् ।’ निर्वाचनको काममा आयोग, ७७ वटै जिल्ला निर्वाचन कार्यालय, १६५ निर्वाचन अधिकृतको कार्यालय र मतदान केन्द्रमा खटिने कर्मचारी न्यूनतम संख्यामा रहने व्यवस्था गरिएको पनि आयोगले जनाएको छ ।
आयोगले कोरोनाको सुरक्षा सतर्कताका लागि आवश्यक पर्ने न्यूनतम सुरक्षा व्यवस्थाका लागि ३७ करोड ४१ लाख ७४ हजार रुपैयाँ प्रस्ताव गरेको छ ।
प्रतिक्रिया