जनकपुरधाम । धनुषामा एकजनालाई गोली हानी हत्या गरेका एक व्यक्ति १० वर्ष पछि सिरहाबाट पक्राउ परेका छन् ।
पक्राउ पर्नेमा धनुषाको गणेशमान चारनाथ नगरपालिका-२ बस्ने ३४ वर्षीय जागेश्वर यादव रहेको सिरहा प्रहरीले जनाएको छ ।
यादवले २०६८ साल भदौ २९ गते सिरहाको तत्कालीन धनगढी गाविस वडा नम्बर-९ बस्ने श्रीप्रसाद साह सोनारको गोली हानी हत्या गरेका थिए । बा. ११ प ४९४२ नम्बरको मोटरसाइकल चढेर धनुषाका तत्कालीन भरतपुर गाविसस्थित वीरेन्द्र बजारमा फुटबल खेल्न आएका सोनारलाई जागेश्वर यादव समेतले गोली प्रहार गरी हत्या गरेर स्थानीय बालुवाखोलाको काटा झारीमा शव फ्यालेका थिए ।
उनीहरुले सोनारको हत्या गरेपछि मोटरसाइकल, नगद २५ हजार, आधी तोला सुनको औंठी, एक तोला सुनको सिक्री, चाँदीको ब्रासलेट एक थान र मोबाइल लुटेका थिए ।
यादवलाई इलाका प्रहरी कार्यालय मिर्चैयाको टोलीले मिर्चैया नगरपालिका-३ बाट बुधबार साँझ पक्राउ गरेको जिल्ला प्रहरी कार्यालय सिरहाका प्रवक्ता शालिग्राम शर्माले जानकारी दिए ।
पक्राउ परेका यादवलाई थप अनुसन्धानका लागि धनुषा प्रहरीको जिम्मा लगाइएको छ ।
प्रतिक्रिया